గుడిసె గుండె కోత

తెల్ల వారని రేయికి  

ఎన్ని చందమామలు అద్దితేనేమి   

            నిరంతర భాష్పలకి 

          ఎన్ని భాష్యాలు కూర్చితేనేమి 

నిట్టూర్పుల సేగలకి 

ఏ సునామి రాదేం

          ఎన్ని రాత్రులను దారవోయను

           ఒక్క వేకువకై 

పోగొట్టుకోవడం ఎంత సులభం 

కుడి చేయి వెతుక్కుంటుంటే 

ఎడమ చేయి అడ్డుతగలడం

అవ్వ......! ఎంత విడ్డూరం.

           స్వేచ్చా వాయువులకై

           గాలిలో వెదుకుతున్నాయి 

           వేలాది ప్రశ్న ముఖాలు.

చితికిన బ్రతుకు వీణ తీగలు

సవరించుకుందామంటే

ఆ తీగలే ఉరి తాల్లవుతున్న వైనం

          చలువ రాతి మేడకేంతెలుసు

          గుడిసె గుండె కోత

          ఏ గానం పాడిన 

         స్వార్థపు జీర అడ్డుతగులుతూనే ఉంది

ఇక దీక్ష శిబిరాలకై

పక్కా ఇల్లు నిర్మించాల్సిందే

 ఇన్నేళ్ళ కసి అంతా

గాండ్రించే గొంతుకై

ఎత్తిన పిడికిలి ఎరుపై

స్వజాతి బానిసత్వానికి

చరమ గీతం పాడాల్సిందే 

             మనసు ప్రశ్నకి 

              మనిషే జవాబు.