రాజిన కొలిమి

నమ్మక పు ఊపిరిని

ఉరికోయ్యకేలాడదీస్తే

నినాదమై మ్రోగింది 

తేనెపూసి పక్కల పొడిస్తే 

గేయమైనది 

ఇంక కవితెక్కడది

 కాకరకాయేక్కడిది

మిగిలింది గుండె కోతనే 

 పాటెక్కడిది

ఆటెక్కడిది

కేవలం కంటి ఎర్రజీరనే

కంటిపాపపై రాసుకున్న 

ఎన్నికలల భవిష్యత్తు  

రాజకీయ జూదగాడి చేతిలో 

పావైపోయే 

ఇగ ఓటేక్కడిది

తూటా ఎక్కడిది 

 సీరఫ్ గుండెసెగలే 

నొప్పి ఒకని పెయిల 

మందోకని చేయిల 

ఉన్నోనికి నవ్వులాటాయే

లేనోనికి కంటిదారాయే 

ఊసర వెల్లుల 

మాటమార్పిడి మాయలాటలలో 

ఎవడు మనోడు

ఎవడు మందోడు  

ఏవి రాజీనామాలు

ఏవి పంగనామాలు 

 పలుకోట్ల గాయాల గానం  

శిరమెత్తి శివమెత్తి గళమెత్తి 

డప్పు సప్పు డోలే ఉరుకుతుంటే   

 ఇగ ఆశ నివురు కప్పిన నిప్పైనా

నిరాశ రాజిన కొలిమిమంటైన 

ఒకటే ఆరాటం 

 ఒకటే పోరు  మార్గం  

 ఒకటే నినాదం 

జై తెలంగాణ