బాలగేయాలు

*బాల గేయం*
*చెట్టమ్మ*
చిట్టి చిట్టి చేతులతో 
మొక్క నాటుదాం 
నీరు పోసి కంచి వేసి కాపాడుదాం 
అమ్మ నాన్న పేరు పెట్టి ఆడుకుందాం 
ప్రతిరోజు చూసుకుంటూ 
స్నేహం చేద్దాం
తొలి ఆకు తొడిగితే 
తేలిపోదాం 
మారాకు తొడిగితే 
మురిసిపోదాం 
ఇంతింతై వృక్షమై 
ఎదగనిద్దాం 
ఆ ఆకు ఈ కొమ్మ
ఆ మొగ్గ ఈ పువ్వు 
ఆ కాయ ఈ పండు 
ఇచ్చేటి చెట్టమ్మకు 
దండంపెడదాం
ఆ చెట్టు నీడలో 
ఆడుకుందాం 
కలిసి పాడుకుందాం.
--డా.శారదాహన్మాండ్లు.

చినుకు చినుకు రాలింది దోసిలి పట్టు 
పెద్దవానై కురిసింది 
ఇనుకుడు గుంతను కట్టు 
నీరేగా ఆధారం 
నీరే మన ప్రాణం 
చెరువులుగా కుంటలుగా నీటిని దాచిపెట్టు
పచ్చగ పంటలు 
ఎదగాలన్నా 
స్వేచ్చగా చేపలు 
ఈదాలన్నా
ఇంటి నిండా లైట్లు 
వెలగాలన్నా
మనిషి హాయిగా 
బ్రతకాలన్నా
నీటిని పొదుపుగా 
కూడబెట్టు 
రేపటి మన సోదరులకు
దాచిపెట్టు.
--డా.శరదాహన్మాండ్లు.










రుబాయీ

రుబాయి
మతం మత్తుఎక్కువైతే ఉన్మాదమే 
ప్రేమ పిచ్చి ఎక్కువైతే ఉన్మాదమే
అతి అన్ని విధాలా చేటే కదా మిత్రమా!
సంపద మీద ఆశ ఎక్కువైతే 
ఉన్మాదమే.

అక్షరాలను దిద్దు
చదువు సాకారమవుతుంది
కలను ఇలపై దిద్దు
ఆశలు సాకారమవుతాయి
దిద్దుకోవడం తప్పేమీ కాదు మిత్రమా!


బాల్యాన్నీ వికసించనీ
యవ్వనాన్ని అరగదీయనీ 
అణువణువు పండితేనే మాధుర్యం మిత్రమా!
వృద్ధాప్యాన్ని వెలుగించనీ.

కొత్తగా పుట్టాలని ఉంది 
కొత్తగా రాయాలని ఉంది 
సరికొత్తగా వికసించడం నైజం మిత్రమా!
పాతను పాఠంగా నేర్వాలని ఉంది.

మనిషి ఎప్పుడు మాయమవుతాడో తెలియదు మనసు ఎప్పుడు 
మారిపోతుందో తెలియదు ఆశాశ్వతంపై శాశ్వతముద్రలు వేస్తుంటాము మిత్రమా!
ప్రకృతి ఎప్పుడు పరవశిస్తుందో తెలియదు.

పరిశోధనకు ప్రశ్న పునాది 
ప్రశ్నకు ఆలోచన పునాది 
విజ్ఞానం తోనే ప్రగతి మిత్రమా!
ఆలోచనలకు చదివే పునాది.
సైన్స్ డే శుభాకాంక్షలు.

కవిత్వం రాయందే ఉదయం వెచ్చబడదు 
కవిత్వం రాయందే హృదయం చల్లబడదు
ఒక్క వాక్యానికై అన్వేషణ మిత్రమా!
కవిత్వం వికసించందే జీవితం
దిద్దబడదు.

కాటుక కరిగిన రాత్రులకు వెన్నెల నద్దనీ
కలతల నలిగిన మనసులకు మోహము నద్దనీ
మేలుకొలుపే కలం పని కదా మిత్రమా!
వేదన చిందిన వాక్యాలకు కవిత్వము నద్దనీ








సూక్తి

సూక్తులు రాజకీయం నేర్చుకుంటారా, తత్వశాస్త్రం తెలుసుకుంటారా, ప్రేమను అనుభూతి పొందుతారా, భక్తి రహస్యం కనిపెడతారా, జ్ఞానులవుతారా, లేదు కనీసం మనిషి మనిషిలా బ్రతికితే చాలు అని అనుకుంటున్నారా అయితే భగవద్గీత చదవండి. మనసారా ఆ గీత ప్రదాతను నమస్కరించండి.🙏🏽
దోస్తానం (స్నేహం) అడుగులో అడుగు మాటలో మాట మనసులో మనసు ఎప్పుడు కలుస్తదో అస్సలు తెల్వది గంతే ! సుఖ దుఃఖాలు కాకెంగిలై పంచుకునుడు మొదలైతది బడిలో దెబ్బలైనా బతుకు వడదెబ్బలైనా నిబ్బరంగా నిలబడడానికి తోడు నీడైతది కన్నీళ్ళకు నవ్వులద్దడం ఒక్క దోస్తానంకే తెలుసు దోస్త్ తో మౌనం కూడా మూగ భాషలాడతది ఎన్ని సార్ల కచ్చి ఎన్ని సార్ల దోస్త్ అయినా బాల్యం నుంచీ దోస్తానం కంచెలా మారి పహారా కాస్తనే ఉంటది వయసుతో పాటు సాగుతూ మరణం అంచుల వరకూ సాగే దోస్తానమున్నోళ్ళు శ్రీమంతులే దోస్త్ తో సాగే బతుకంతా పైలమే. డా. శారదాహన్మాండ్లు