బాల్యం

బాల్యం జాతర లో కొన్న 

రంగుటద్దాలు పెట్టుకున్నది 

రంగు రంగుల లోకం

సీతా కోకచిలుకై  పరుగెత్తుతుంటే 

దానెంట పాదాలు

పదనిసలు పాడాయి

కాలం కరిగిపోయింది

రంగద్దాలు వెలసిపోయాయి

రంగుల్ని అందుకోలేక 

పాదాలు పల్లెరులయ్యాయి 

కాముని జాజర వర్ణాలన్ని

విలీనమై ఓ విశాల 

శ్వేత వర్ణానికి జన్మనిచ్చాయి

అ విశాల విశ్రాంత చాయలో 

బాల్యం జాతర గుర్తొచ్చి 

మనసు తుమ్మెదై

సప్తవర్ణ గానాన్ని  

వినిపిస్తూనేఉండేది